Главная   Контакты
Авторизация
логотип маленький.jpg
Учебно-научный центр нартоведения и полевой фольклористики АГУ




Нарҭдырреи адәынтәи афольклорҭҵаареи рцентр 5 шықәса ахыҵра иазкны
21.12.2016
Аҧсуаа рфольклор аизгареи аҭҵаареи рус хацыркужьҭеи имаҷымкәа аамҭа шыбжьысхьоугьы, иахьа уажәраанӡа иҟоуп иҭҵаам ахырхарҭақәа. Ҳәарада, акыршықәса раҧхьа иҟаҵаз анҵамҭақәа иахьа аҧсуа фольклор иахьтәы фондны иҟоуп, раҧхьатәи аҭҵаамҭақәа ҳаамҭазтәиқәа шьаҭас ирымоуп. Аха крызҵазкуа акакәны иҟоуп ицәырҵуа атеориақәеи агәаанагара ҿыцқәеи хшыҩзышьҭра рыҭаны, аҭҵааратә ус амҩаҧгара, атехникатә хархәага ҿыцқәа рыла аматериал анҵара, аҵәахра.
Абас еиҧш иҟоу ахықәкқәа нанагӡоит Аҧснытәи аҳәынҭқарратә университет аҿы еиҿкаау, иахьа зиубилеи азгәаҳҭо, Нарҭдырреи адәынтәи афольклорҭҵаареи рцентр (НААР). Ацентр аартра алыршахеит ауниверситет аректор иҟаиҵаз ақәҵара (29.06.2011) инақәыршәаны.
2012 шықәсазы имҩаҧысит Ацентр аӡыргара.
Ацентр шьақәгылоуп ааҩык аусзуҩцәа рыла: Ацентр аиҿкаара аҧшьызгаз, директорс иамоу З.Џь.Џьапуа (афилологиатә ҭҵаарадыррақәа рдоктор, Аҧснытәи аҳәынҭқарратә университет апрофессор, Аҧсны аҭҵаарадыррақәа Ракадемиа академик), адиректор ихаҭыҧуаҩ А.П.Какоба (Аҵареи аҭҵаарадырреи рминистр, Аҧсуа литература акафедра адоцент), аҭҵаарадырратә усзуҩ еиҳабы С.З.Ҭарба (аҭоурыхтә ҭҵаарадыррақәа ркандидат, адоцент), аҭҵаарадырратә усзуҩцәа: Н.С.Барцыц, Е.В.Ҭодуа, С.О.Ҳаџьым, М.Ф.Ҧлиа, авеб-оператор А.И.Дбар.
Нарҭдырра ацентр ауниверситет аҿы аиҿкаара хықәкы хадас иамоуп изызҳауа аҿар рыҩныҵҟа аҧсуа фольклор аҳаҭыр ашьҭыхра, аинтерес дыркра, заҧхьаҟа афольклорист, мамзаргьы аетнограф изанааҭ ала аҵара иацызҵарц зҭаху аҿар ралҧшаара, урҭ Ацентр аусура радҧхьалара, иааизакны иуҳәозар, аҧсуа фольклорҭҵааҩцәа рабиҧара аихаҳара.
Иҳәатәуп Ацентр ишамоу ахатәы емблема. Уи авторс дамоуп асахьаҭыхҩы Б.Џьапуа. Ишьақәырҕәҕәоуп аҧсышәалеи урысшәалеи иҟоу асериақәа хҧа: «Афольклортә культура адунеи», «Ажәабжьҳәаҩи уи итексти», «Аҧсуаҭҵааҩцәа нагақәа». Ах-сериакгьы ирымоуп рхатәы емблемақәа.
Ацентр иамоуп ахатәы саит. Ара еснагь иҟоуп алшара НААР аусура ацашьа ҳзырбо аинформациа ҿыц. Асаит иамоуп еиуеиҧшым арубрикақәа. «Аекспедициа» захьӡу арубрикаҿы иҭоуп Ацентр адәынтәи аҧшаарақәа ирызку аинформациа. Арубрика «Афольклористцәа» – аҧсуа фольклорҭҵааҩцәа рбиографиақәеи русумҭақәа рсиеи. «Ажәабжьҳәаҩцәа» – еицырдыруа аҧсуа жәабжьҳәаҩцәа, урҭ рфотосахьақәа, ртекстқәа. Ацентр аартра иазкны хазы арубрика ыҟоуп – «Аусзуҩцәа» – русумҭақәа релектронтә вариант. Асаит аус адиулоит А.И.Дбар.
НААР ҭҵаарадырратә шьаҭас иаиуит: аҧсуа нарҭтә епос томрацәала аҭыжьра азырхиаразы еизгаз атекстқәеи, Аҧснытәи аҳәынҭқарратә университет афилологиатә факультет астудентцәа ранҵамҭақәеи, Ҭырқәтәыла инхо аҧсуаа рҿы еизгаз аматериалқәеи.
Абасала, Ацентр аҿы ишьақәгылоит есааира аматериал ҿыц ала ихаҭәаауа, ахатәы лабораториа. Аханатәгьы иӡбан урҭ аматериалқәа аус рыдулашьа апринцип: ҭырқәтәылатәи анҵамҭақәа хазы иҭыҵуа, Аҧсны аҩныҵҟа еизгоу аматериал хазы иҭыҵуа. Убри аихшашьа инақәыршәаны 2014 шықәсазы иҭыҵит ҭырқәтәылатәи анҵамҭақәа аҧхьатәи рышәҟәы.
Ацентр аусмҩаҧгатәқәа рхыҧхьаӡараҿ иҟоуп еиуеиҧшым астол гьежьқәа, аконференциақәа рымҩаҧгара. Урҭ рахь еснагь ааҧхьара рымоуп астудентцәа. Зураб Џьапуеи Адгәыр Какобеи зыҧхьо алекциақәа лассы-лассы имҩаҧысуеит Ацентр аҩныҵҟа. Астудентцәа афольклортә текст ахҩылаараҿы, ажәабжьҳәаҩ инысмҩа ашьақәыргылараҿы апрактикатә ҧышәа роурц азы иазыҟарҵоит.
Нарҭдырра ацентр аусураҿы ихымҧадатәны иҟоуп Аҧсны анҭыҵ имҩаҧысуа аконференциақәа аҽрылархәра. Аҳәаанырцәтәи аҭҵаарадырратә процесс абара аҵак ду амоуп еиҳараӡак ацентр аусзуҩцәа ҿарацәа рзы. Убас, Ацентр аҵарауаа рхы рыладырхәуеит Аҧсни Аҧсны анҭыҵ еиуеиҧшым ақалақьқәа рҿи имҩаҧысуа аҭҵаарадырратә форумқәа, аконгрессқәа, ақалақь Москва имҩаҧысуа Аҧхынтәи афольклористцәа рышкол уҳәа. Араҟа еибадыруеит афольклористцәа ҿарацәеи аҵарауаа хатәрақәеи, идырҳауеит аҩызцәа. Русумҭақәа рҿы зыда ҧсыхәа ыҟам аиҿырҧшратә анализ аҟаҵаразы ацхыраара бзиа роуеит. Урҭ аныҟәарақәа раан Аҧсны аҩныҵҟа иумоуа алитература ахәҳаразы алшара роуеит. Ус еиҧш еидкылаз ашәҟәқәеи Нарҭдырра ацентр адиректор ихатәы библиотека аҟынтә иаагаз ашәҟәқәеи рыла ашьақәгылара иаҿуп ахатәы библиотека.
НААР иамоу макьана акьыҧхь зымбац аматериалқәа шырацәоугьы, еиҧмырҟьаӡакәа имҩаҧысуеит афольклор аизгаразы аекспедициақәа. Аҧсны аҩныҵҟа урҭ амобилтә ҟазшьа рымоуп. Насгьы Аҧснытәи аҳәынҭқарратә университет афилологиатә факультет аҧсуа литература азанааҭ астудентцәа рзы ес-ҧхынра еиҿыркаауа апрактика аҵыхәтәантәи ҩышықәса рзы имҩақәырҵоит, апрактикатә усура иацу азҵаарақәа ртәы реилдыркаауеит, атекст анҵашьеи анаҩстәи ахҩылаашьеи рзы амастер-классқәа мҩаҧыргоит НААР адиректори уи ихаҭыҧуаҩи.
Крызҵазкуа хҭысны иҟоуп 2009 шықәса инаркны, Зураб Џьапуа иаҧшьигаз апроект аҳәаақәа ирҭагӡаны, Ҭырқәтәыла имҩаҧысуа афольклор-етнографиатә експедициақәа. Арҭ ашықәсқәа ирылагӡаны еизгаз аматериал аус адулара хацыркуп. Урҭ анҵамҭақәа жанрла еихшаны, томла рҭыжьра азгәаҭоуп. 2013 шықәса иалагӡаны еиқәыршәан актәи ашәҟәы. Уи азкуп аҧсуа нарҭтә епос, хьӡысгьы иамоуп: «Аҧсуаа рфольклор ҭырқәтәылатәи анҵамҭақәа. I атом: Нарҭаа / З.Џь. Џьапуа иредакциала». Иара ҭыҵуеит «Афольклортә культура адунеи» асериала. Мшын-нырцә инхо аҧсуаа рфольклор анҵареи аҭҵаареи рҭоурых (раҧхьаӡатәи анҵамҭақәа инадыркны ҳаамҭазтәиқәа рҟынӡа) инарҭбаан иаарҧшуп ашәҟәы аазыртуа Зураб Џьапуа ҩ-бызшәакны иҟоу иаҧхьажәаҿы. Аҧхьажәа аҭырқәшәахь еиҭеигеит Оқтаи Чкотуа. Ашәҟәы иагәылоуп еиҭазҳәаз ажәабжьҳәаҩцәа рфотосахьақәа, нарҭаа рҳәамҭақәа рыла ишьақәыргылоу аиллиустрациақәа. Ашәҟәы аӡыргара мҩаҧган Ҭырқәтәыла ақалақь Диузџьеи Адаҧазари. Ҳџьынџьуаа гәахәара дула ирыдыркылеит ари ахҭыс. Иара убри ашықәсан ашәҟәы аӡыргара мҩаҧган Ацентр аҿгьы. Уи ахҭыс иалахәын аҵарауаа, ҳџьынџьуаа, астудентцәа.
Ацентр аусура иалҵшәаны аҧсуа фольклорҭҵаараҿы ицәырҵуеит ахырхарҭа ҿыцқәа. Убас Нарҭдырра ацентр аҿы нап дыркуп иахьа уажәраанӡа зыҭҵаара, уимоу, системала зеизгара иаламгацыз Аҧсны Аџьынџьтәылатә еибашьра иарҿиаз аҿаҧыцтә ҧҵамҭақәа. Аиааира 20 шықәса ахыҵра инамаданы, Зураб Џьапуа иредакциала, Ацентр аҭҵаарадырратә усзуҩцәа Наала Барцыци Саида Ҳаџьыми акьыҧхь иаздырхиеит 1995 шықәсазы Зураб Џьапуа аинрал Гиви Агрба иҿынтә иҟаиҵаз абжьынҵамҭа тематикала изықәшәо ажанр ахьӡ иара ашәҟәы ахаҭагьы иахьӡны: «Аибашьра ахроникат: Аинрал Гиви Агрба иҿаҧыцтә гәалашәарақәа». Аибашьра афольклор иамоу аҷыдарақәа, уи аҭҵаараан хшыҩзышьҭра зҭатәу, хаҭала иара ашәҟәы аус адулараан ицәырҵуаз азҵаарақәеи урҭ ҳасабшьас ирыҭази ртәы иазааҭгылоуп «Ахроникат» злаатуа Зураб Џьапуа иаҧхьажәаҿы. Ашәҟәы аӡыргара мҩаҧган иара ашықәс иалагӡан. Иҳәатәуп, иахьа уажәраанӡа ашәҟәы иадҵаало шмаҷҩым.
Имаҷымкәа Ацентр аусзуҩцәа рыстатиақәа акьыҧхь рбоит Аҧсны анҭыҵ иҭыҵуа (Москва, Санкт-Петербург, Воронеж, Елиста, Ереван, Владикавказ, Нальчик, Магас, Маикоп уҳәа) аизгақәа рҿы.
2014 шықәсазы Ацентр адиректори аҭҵаарадырратә усзуҩ Есма Ҭодуеи еиқәдыршәеит академик Ш.Хь.Салаҟаиа 80 шықәса ихыҵра иазку афольклори алитературеи рзы аҭҵаарадырратә статиақәа реизга. Аизга иахьӡуп «Аепикатә традициа аеволиуциа: Академик Ш.Хь.Салаҟаиа 80-шықәса ихыҵра иазкны». Уи иагәылалеит 50 инарзынаҧшуа зыҩаӡара ҳараку аҵарауаа русумҭақәа. Ашәҟәы ҭыҵит «Аҧсуаҭҵааҩцәа нагақәа» захьӡу асериа ала. Аизга аҭыҵра иазкны арецензиа иҩит И.Д.Анчабаӡе.
Ацентр аиҿкаара аханатәгьы уасхырс иазышьҭан, иахьанӡагьы ауснагӡатәқәа ираҧхьатәины иҟоуп Зураб Џьапуа иредакциала аҧсуа нарҭтә ҳәамҭақәа аҭыжьра разырхиара: «Нарҭаа: Аҧсуа фырхаҵаратә епос ф-томкны». Акыршықәса ицоз аус адулара ашьҭахь аизгақәа реиқәыршәара аус ахыркәшарахь инеит. Атомқәа реизга аҧсуа нарҭтә ҳәамҭақәа ҭызҵаауеи гәахәарыла иаҧхьои рзы хәы змам ҳамҭахоит.
Ахыркәшарахь инеит Г.Ф.Чурсин ишәҟәы «Аҧсны аетнографиазы аматериалқәа» аиҭаҭыжьра. Уи аус хаҭала лнапы иануп Сима Ҭарба.
Аҭыжьырҭаҿы иҟоуп Е.В.Ҭодуа еиқәлыршәаз «Аибашьҩы акорреспондент Кәасҭа Габниа имшынҵа» зыхьӡу ашәҟәы. Уи еиқәыршәоуп аибашьҩы имшынҵала. Еиқәырхоуп атекст астиль.
Иазгәаҭатәуп, Ацентр аҩныҵҟа иааиҧмырҟьаӡакәа ишцо еиқәханы иҟоу ажәытәтәи акассетақәа (еиҳарак Аҧснытәи аҳәынҭқарратә университет филологиатә факультет астудентцәа ранҵамҭақәа) адискқәа рахь риагара (оцифровка). Уи аус ҩаӡара ҳаракыла инарыгӡоит Адгур Какобеи, ҿыц иадыҧхьалаз аспециалист қәыҧш Тимур Миқааи.
Ацентр лассы-лассы иаҭаауеит асасцәа. Урҭ рхыҧхьаӡараҿы иҟоуп Џьорџь Хьиуитт, Маҳинур Папа-ҧҳа, Варвара Добровольскаиа, Мариа Станиукович, Владимир Напольских.
Имҩаҧысуеит астудентцәа алархәны алекциақәа.
Ҳәарада, аусруа маншәаланы имҩаҧысларц азы иҟазароуп аҭҵаарадырратә ҭагылазаашьагьы. Иахьа уажәраанӡа Ацентр насыҧс иамоуп, иара аусушьа збо, изаҳауа щтъыла анапхгара, Аҧснытәи аҳәынҭқарратә университет анапхгара рҟынтәи ишамоу аилкаареи адгылареи.
Иааидкыланы иуҳәозар, НААР аҿы хырхарҭа рацәала иҭырҵаауеит аҧсуа фольклор ажәашықәсақәа раҧхьа иҟаҵаз анҵамҭақәа инадыркны ҳаамҭазтәиқәа рҟынӡа. Аҭҵааратә ус инаваргыланы, имҩаҧысуеит афольклористцәа ҿарацәа рабиҧара реиҵааӡара.
Нарҭаа ирызку ажәытә фырхаҵаратә епос аҭҵаара шьаҭас изауз НААР хәышықәса ахыҵра азгәаҭо иҳәатәуп, хара имгакәа аҧсуа фольклори аетнографиеи хырхарҭа рацәала иҭызҵаауа, ҳаамҭа иақәшәо аҧсуа фольклористцәа ирышколахоит ҳәа агәра угартә аҭагылазаашьа шыҟоу.

Саида Ҳаџьым,
НААР аҭҵаарадырратә усзуҩы

IMG_2164.JPG

IMG_2170.JPG

IMG_2231.JPG


← Назад к списку новостей